لولفين

تقاليد

2009-07-01T09:10:00.001-07:00

لم أكتب منذ وقت طويل جداً. منذ وصول اللولفينة الصغيرة والتي أصبح لها لولفينة مضحكة أخرى.
أصيبت اللولفينتان الصغيرتان في الأسبوع الماضي بنزلة معوية مما أستدعاني لفطام اللولفينة المضحكة. والذي سمعته بعد ذلك من السيدة التي تساعدني في المنزل كان يحتاج لوقفة: فقالت لي: تصوري حضرتك، مرات أخويا فطمت ابنها أول إمبارح ونزلت الشارع تاني يوم. قلت لها: طب وإيه يعني: قالت: يا خبر هو حضرتك مش عارفة إن إلي يفطم عيل لا يكبس على حد ولا حد يكبس عليه ولا يشاهر حد ولا حد يشاهره ولا يدخل سوق فيه باذنجان ولا لحمة. فلت: يا سلااام إزاي الكلام ده؟ هايحصل إيه يعني؟
قالت: يعني والدتك ماعاملتش كده؟ فقلت : لا. قالت: عشان هي ست طيبة، ربنا سترها معاها. قلت: ما أنا فطمت اللولفينة الصغيرة من قبل ولم أعمل كده.

كان الإستغراب والإندهاش على وجهها يدعو للضحك الذي منعته كي لا أسخر منها ولكن قلت لها ببساطة : سيبيها على الله.
أيستطيع أحد أن يقول لي أصل هذه التقاليد؟

اللوفين الصغير

2006-03-08T23:53:00.000-08:00

أحتاج مساعدة المدونين،
اللولفين الصغير في الطريق إن شاء الله. بكرة هايبتدي سباحة البحر التاسع.
ولكن عندما يحضر بإذن الله أسميه إيه لو كان لولفينة صغيرة؟؟؟
دي مسئولية كبيرة وأنا مش لاقية إسم جامد ويكون عربي.

من الأعماق ماتش مصر والكونغو

2006-02-06T06:37:00.000-08:00

يوم الخميس،
الغول يتصل بنا هايجي بكرة يتفرج على الماتش معنا في الأعماق وكمان الست نعامة إلّي كمان قالت لكل الكائنات البحرية والبرية. أهلاً وسهلاً بس يقعدوا فين كل دول؟؟؟؟؟
هي كنبة يا سيد.
المهم يوم الجمعة جبنا شيبسي وعملنا فيشار و جبنا مشاريب وكل واحد جاب حاجة في إيده و هو جاي. كنافة و باتيهات و يوسفي وكيك وكل خيرات الله.
ماكانش ناقص إلا إن إحنا نكسب.
الإستاكوزا فنانة بطبعها و جابت معها أعلام و كل أدوات التشجيع اللازمة. وأغلب الكائنات كانت لابسة أحمر واللفينج كان مليان على أخره الكنبة والأرض والترابيزة والطرقة مافيش مكان لقدم ولا كأننا في الإستاد. بس الجو كان لطيف أوي حتى كان فيه إثنين من بحر بعيد مش أصحابنا أوي بي تلفزيونهم باظ جم اتفرجوا عندنا. يا حلاوة يا ولاد. بس المكان ساع من الحبايب ألف وشجعنا بكل قوتنا وبل الأعلام والحمد له كسبنا أه صحيح كان ماتش كفته بس كسبنا.
وعقبال الماتش الجاي واتفضلوا معنا في الصالون.

معرض الكتاب

2006-01-24T02:19:00.000-08:00

ألمانيا ضيف شرف على

معرض الكتاب السنة دي.
دي أول مرة المعرض يعمل حاجة ذي كده واختاروا ألمانيا لأنها السنة إلى فاتت في معرض فرانكفورت للكتاب كانوا مستضفين العالم العربي ضيف شرف.

وبما إني بشتغل في المعهد الثقافي الألماني فأنا جوة الموضوع جداً ومطحونين في الشغل بنشتغل كل يو من غير weekends خلاص كلنا تعبانين.

الجناح الألماني في المعرض كبير غير كل سنة والتصميم حلو أوي عاملته مصممة مخصوص من ألمانيا تبع معرض فرانكفورت.

أحكي لكم بقى شوية عن كوميديا المعرض :)))

الناس يا جماعة في المعرض بيأخذوا كل حاجة طول ما هي ببلاش أي حاجة وكل حاجة مش مهم هي إيه
كل الflyers الbrochures كله وبل كوم وبالألماني مش مهم أي حاجة حتى الكمبيوتر إلي إحنا حطينه نعرض عليه صفحة الإنترنت بتاعتناعايزين يأخذوه.
في كمان في الجناح babyfoot عشان الناس تلعب بيها برده عايزين يإما يأخذوها يا يشتروها وده هايل.

أما بقى لمّا بيكون فيه ندوة في الجناح وفيها ترجمة بيكون فيه سماعات للترجمة الفورية برده السماعات عايزين يأخذوها و المضحك إن فيه ناس لا ليها في الطور ولا الطحين ويأخذوا سماعة كده وخلاص عشان يشتركوا معنا أل يعني مهتم أوي. والله الناس غلابة وبيضحكوني أوي.

في كتير بقى يجوا يسألوا إنتوا المركز الثقافي الألماني؟؟؟؟ طب بتدرسوا إنجليزي يا سيديييي إيه الذكاء ده.

أما بقى الرجل الطائر

إلي كل الجرائد كتبت عنه ده كمان كان حكاية
الرجل ده من ألمانيا إحنا إلي جايبينه ويبعمل عروض في كل حته ولمّا تشوفه فعلاً هاتشوف رجل طائر
بس يا عينييي بقه على الناس وإلي عملته........ واحدة ست ورايا أول حاجة قالتها وهي مخضوضة بسم الله الرحمن الرحيم (تفتفتفتفتف) أيه ده ؟؟ واحد بقى طلع إشاعة يبن الناس إن ده جن ولازم نرميه بالطوب (تقولش إبليس وبيرجموه) وفعلاً حدفوا الرجا الغلبان بالطوب.
والدنيا كانت زحمة موت حوله وفيه ناس تانية بقى جابولوا شاي وهو طاير كده. واحد بقي كان بيحلف إن الذراع إلي الرجل ساند بها على الحائط مش حقيقة وإحنا نقولوا يا عم لأ ذراعه والله يقول ماتحلفوش دي باينه أوي صناعي.
الإخوة الألمان بقه إلّي معانا طبعاً تريقه بقى جن إيه وبتاع إيه؟؟
مش بقول إن الناس كلها كده بس ......

ومازال المعرض مستمراً .... ولي معكم حكايات أخرى

الدرب الأحمر

2005-10-12T00:32:00.000-07:00

وأخيراً زست،
بقالي كتير أوي ماكتبتش. بس مطحونة في الشغل وكمان مشروع فني كده كنت بعمل فيه.
معهد جوته قال هانعمل مشروع فني في القاهرة الفاطمية وأنا بامووووووت في القاهرة القديمة.
قلتلهم فيها لاخفيها.
المهم المشروع بنحضر له يجي من أكتر من 6 شهور.
بس اشتغلنا بجد من إسبوعين مثلاً.
اختارنا منطقة في الدرب الأحمر الّي هابقي إن شاءالله أكلم عليه في وقت تاني بالتفصيل.
في ساحة جامع أصلم السلحدار المعروف هناك بأصلان. الجامع قديم أوي من سنة 1344 ومش محسوب تبع الآثار (ماكانوش عارفين عنه حاجة في الهيئة) المهم أخذنا الموافقات من هيئة الآثار والحي ومجلس المدبنة وهيئة الكهرباء إلخ...............

كل واحد من مجموعة الفنانين طلع بفكرة شكل وكان فيه حج كبير كده جايبنهولنا من ألمانيا آل خبير في إضاءة المدن، أصل المشروع كان ميديا أرت، تركيبات ضوئية وصوتية.
Light an sound installation

المشروع بتاعي عملته مع فنان تاني هيثم نوار إلّي كمان كان عنده مشروع لوحده.
وبصراحة تعب جداً وكان مطحون طول الوقت وهو إليّ طلع فكرة إننا نعمل فلاير للمشروعين بتوعنا عشان الناس تفهم.

aslam8

المشروع الأول كان في حارة صغيرة مطلة على ساحة المسجد و سلكنا فيها ضوء أصفر يمثل النهار مصاحب لأصوات تعبر عن حالة الفترة مابين الفجر والمغرب زي آذان الفجر بدايةً وبعدين تعلى الأصوات واحدة واحدة وتسمع صوت الورش إلّي في المنطقة والناس والدوشةوالقهوء والطاولة... ثم تحويل الضوء إلى الأزرق ليعبر عن حالة السكون ما بعد العشاء وحتى الفجر مع التكرار.

المشروع التاني هو ترميم تخيلي لإحدى واجهات المسجد الجانبية، بمعنى عرض ضوئي على هذه الواجهة يمثل الصورة القديمة للمسجد يعني من غير العرض الضوئي ده ماتشوفش أى حاجة من التفاصيل الزخرفية.

يمكن الصور توضح شوية

aslam4

aslam9

وسجلنا في التليفزيون وهيصة.
وده كان أول مشروع فني ليّه في حياتي. ألف مبروك لينا

لولفين الفنان

تحية كبيرة

2005-08-04T02:24:00.000-07:00

أبي شخصية لطيفة جداً ودائماً في الأعياد والمناسبات عند إجتماع العائلة كلها يطلبوا منه أن يغني أو يسرد بعض الأبيات العامية لشكوكو

لأنه حافظ له حاجات كتير. كتبت هنا واحدة منها تحية لأبي الذي بسرده المستمر لها حفظناها. لست متأكدة أنها لشكوكو إذ ربما تكون لصلاح جاهين. بحثنا عنها في كتب كثيرة ولم نجدها. لكن أنا بحبها جداً. وكتبتها أيضاً تحية للحمارنب لأنه أنشأ مدونة جديدة وهو أيضاً يحبها جداً.

الأولّه بنايوتي سف المال

والثانيّة آآآه من مزمازيل باسكال

والثالثة أتارى القمار لُه حال

الأولّه بنايوتي سف المال.. وجاب بُه إزاز

والثانيّة آآآه من مزمازيل باسكال.. عيونها لُذاذ

والثالثة أتارى القمار لُه حال.. يذل عزاز

الأولّه بنايوتي سف المال.. وجاب بُه إزاز.. مَلاه سبرتو

والثانيّة آآآه من مزمازيل باسكال.. عيونها لُذاذ.. وأخوها مورتو

والثالثة أتارى القمار لُه حال.. يذل عزاز.. ياما سهرته

الأولّه بنايوتي سف المال.. وجاب بُه إزاز.. مَلاه سبرتو.. وسمّاه
روم

والثانيّة آآآه من مزمازيل باسكال.. عيونها لُذاذ.. وأخوها مورتو.. أوام بيعوم

(المقصود هنا أنه ينتقل بسرعة بين الترابيزات في البار أثناء تقديم الخمر)

والثالثة أتارى القمار لُه حال.. يذل عزاز.. ياما سهرته.. وبعت هدوم

من بعد الكاتينة الدهب والدبوس الألماظ بقيت سارح على كتافي صفيحة جاز

على غرار live 8

2005-07-25T04:52:00.000-07:00

السلام عليكم

الفكرة طق حنك راودتنا نحن أيضاً مجموعة من الزملاء.

أن نقف وقفة ضد الإرهاب

فكرنا أن ننظم حفلة على غرار لايف 8 وندعو فرق أو مطربين أو عازفين للمشاركة بدون مقابل

.الفكرة لم تكتمل بعد ولذلك قررنا إن شاء الله ،الاجتماع الأحد القادم ولكن في مجموعة صغيرة لتجنب أي مشاكل للتجمعات الكبيرة.

نرحب أيضاً بالأراء المختلفة

أطلعونا على آخر التطورات من ناحيتكم.

علمت أنكم أيضاً ستجتمعون يوم الخميس القادم.

إذاً نحن في انتظار تبادل النتائج.

هواية

2005-07-17T04:45:00.000-07:00

عندي هواية من صغري و أعتقد أنها عند ناس تانية إن كل حد أعرفه بشبهه بحيوان معين وهذا ليس دائماً مرتبط بشكل الإنسان ,إن كان له عامل أيضاً.

لكن هي حاجة تلقائية.

في ناس سهل أوي أعرف هما يشبهوا مين من الحيوانات و فيه بعضهم صعب شوية يحتاج كثير من التفكير.

بس بجد متعة جداً في هذه الهواية و خصوصاً كمان لمّا أقول لأي شخص آخر على الشبه إلي بين هذا الشخص الأول والحيوان ويقول لي مضبوط تمام ده شكله بالضبط .

ممكن يبقى الإنسان فيه من صفات الحيوان أو شكله أو صوته أي حاجة المهم إنها بتبقى مميزة فيه جداً.

جربوا الموضوع ده هاتستغربوا أوي من الي هاتتوصلوا له ويمكن تضحكوا.

فيه ملاحظة أختي الست نعامة مالهاش علاقة بالنعامة خااااااااالص أختي قرد مسلسِل وده مش معناه إنها وحشة ولا حاجة بس لما تعرفوها تفهموا قصدي على طول.

مملكة البحار

2005-07-14T01:39:00.000-07:00

أختي طول الوقت تكلّم عن الست النعامة بتاعتها، البلوج بتاعها إسمه كده. عشان كده في الأغلب نزلت عليه فاجأة الجلالة انهاردة عشان أعمل بلوج أنا كمان

وبما إن أختي إسمها الست نعامة و ابن عمي هو الحمرنب يبقى أنا يعني لازم أكون من فصيلة الحيوانات اللطيفة. وفكرت شوية مش كثير لاقيت إن أكثرحيوان بحبه هو الدرفيل وبما إني لولو فا سميت نفسي لولفين

طول عمري نفسي أعوم مع درفيل والفرصة الوحيدة إلي جاءت لي كانت وأنا في أولى ثانوي كنت في رحلة مع فصلي في نويبع وفيه هناك رجل فاقد البصر نسيت أسمه المهم الرجل ده مربي درفيل وأخذنا الأتوبيس ورحنا على هناك ووا أسفااااااه أل إيه الدرفيل كان بقاله ساعة داخل في عرض البحر ولسه مارجعش وفضلنا مستانيين الأخ الدرفيل شوية كتير لحد ما المدرس قال يالا نمشي وراح نأبي على شونة

(بالمناسبة أنا لاأعرف أصل(معاني الكلمات) هذا المثل أعرف فقط متى أقوله)

أكلمكم عن فكرتي عن الدرفيل : هو حيوان جامع بين صفات كثيرة جميلة ذكي وطيب شكله جميل وإبتسامته حلوة بتعجبني جدأً وقوي ودمه خفيف وبيعيش في جماعات ومش أي كلام في البحر يعني له شأن وصديق للإنسان

بالنسبة لي أي شيء في البحر بيكون فيه غموض وأنا بحب الغموض. البحر في حاجات كثيرة جداً لم نكتشفها بعد وأشعر دائماً بفضول شديد ناحية أعماق البحار.

وأحب الحكايات عن البحر وما فيه من كائنات حقيقية أو خرافية مثل عروس البحر والله أعلمأشعر وكأن فيي شيء من الدرفيل ولا أقصد طبعاً الصفات الجميلة ولكن شيء من روحه مش عارفة تخاريف لولفين

:))))